МОНГОЛ УЛСЫН
БОЛОВСРОЛ, СОЁЛ, ШИНЖЛЭХ УХААНЫ
САЙДЫН ТУШААЛ
2009 оны 05 сарын 01 өдөр Дугаар 179 Улаанбаатар хот
Сургалтын хөтөлбөрийг зөвшөөрөх тухай
Боловсрол, соёл, шинжлэх ухааны сайдын 2008 оны 73 дугаар тушаалын 1 дүгээр хавсралтаар баталсан “Сургуулийн өмнөх болон бага, дунд боловсролын сургалтын байгууллагын багш, удирдах ажилтны мэргэжил дээшлүүлэх журам”-ын 5.2.1, 5.2.4, 5.2.5 дахь заалт, “Ажлын хэсэг байгуулах тухай” Боловсрол, соёл, шинжлэх ухааны Сайдын 2009 оны 140 дүгээр тушаалыг тус тус үндэслэн ТУШААХ нь:
1. Сургуулийн өмнөх болон бага, дунд боловсролын багш, ажилтанд кредит олгох төрөлжсөн сургалтын хөтөлбөрүүдийг хавсралтын ёсоор зөвшөөрсүгэй.
2. Зөвшөөрөгдсөн хөтөлбөр бүхий сургалтын талаар нийтэд мэдээлж, сургалтын хөтөлбөрөө сайжруулан чанаржуулахад нь сургалт явуулах багуудад зөвлөн туслаж ажиллахыг Ерөнхий боловсролын газар (Д.Эрдэнэчимэг)-т, сургалтын хөтөлбөрийг сайжруулан боловсруулж, сургалтыг чанартай зохион байгуулахыг холбогдох байгууллагын удирдлагад, сургалтын үр ашиг, үр өгөөжид хяналт-шинжилгээ хийж, үнэлгээ өгч ажиллахыг Мэдээлэл, хяналт-шинжилгээ, үнэлгээний газар (Р.Бат-Эрдэнэ)-т тус тус даалгасугай.
САЙД Ё.ОТГОНБАЯР
